Saw-an, Karon hangtod sa Umaabot
BRC, Feb 10, 2025
Two interesting platforms why for two consecutive years eager mouli ang yagit sa lungsod panahon sa BAGAT Festival - the People's Summit and the Organic Agriculture Congress nga concretely in practice gituhog ni sa FLORA Tilapia Hatchery ug paLASANG series...
Tanan man nga kalihukan ug saulog mahinungdanon ug may managsamang gibug-aton, apan sa sama nakung yagit, naay mas naghatag ug interes sa pagsalmot.
Kulukabildo o hawanan nga diin magbagat ang katawhan gikan sa lain-laing hugpong, relihiyon, tribu ug sector alang sa ilang mga nag-unang concerns nga ipadangat sa kagamhanang lokal,ug ngadto sa matag-usa lakip ang mga sugyot nga solbad ug prayoridad nga programa. Hawanan nga dayag mosaway sa mga kakulangon sa programa ug motanyag sa mga sugyot.
Hawanan nga magkahinabi ang mga Komunidad ug ahensya sa kagamhanan nga ginalaumang moresulta sa hiniusang tikang sa pagsolbad.
Hawanan sa pagsalmot sa katawhan sa pag-umol ug padayong pagpalambo ug pagpalig-on sa gipangandoy ug gipaningkamutang Kaugmaon sa mga Sibagatnon ug Lungsod.
Karon nga tuig, ang mga rekomendasyon subay sa mga natagik nga mga concerns sa milabayng summit human gisumiter sa mga ahensya (right after the PS 2025) gitagaag tubag kung unsa na ang gibuhat, nabuhat ug buhaton pa. Dugang usab ang mga awhag sa pagtambayayongay pa.
Natigayon usab ang bayloanay kung unsaon pa sa CSOs sa lungsod nga motaas ang kakayahan diha sa pagsalmot sa mga katikaran sa lokalidad ug kagamhanan. Human niini, nipili ug mga boluntaryong komitiba nga padayong motino sa direksyon ug gimbuhaton hangtod na sa opisyal nga pagkatukod sa People's Council.
Ika-upat na ka higayon karon nga tuig apan ikaduha pa lang nato nga pagsalmot. Sa milabayng tuig gideklara sa representante sa DA NOAP ang pagsuporta sa flagship program sa lungsod nga mahimong Organic municipality. Karon nga tuig giturn-over na ang una sa rehiyon nga OA Hub nga gidumala karon sa Sibagat Organic Farmers Association.
Sa SOAC miaging tuig opisyal nga gilunsad ang Sustainable Sibagat human usab sa sobra Lima ka tuig nga build up ug pagpangandam.
Ang SOAC hawanan alang sa mga pagtulun-an sa kasinatian, pagtoon ug adbokasya gikan sa mga tinugyanan sa ahensya sa goberno, akademya, lider sa lokal nga kagamhanan, simbahan, tribo, negosyo, non-government organizations ug mga mag-uuma alang sa pagtataw, pagtin-aw kung unsa diay ang OA, ang SusAg, ang AgroEcology o ang Malahutayong Kalambuan diha sa Kinabuhi sa katawhan ug Kinaiyahan ug ang umaabot.
Lima na usab ka buhing testamento pamatood sa kaanindot ug ka-epektibo sa organiko ug Malahutayong pag-ugmad sa Kinaiyahan ug panginabuhian. Adunay batan-on, inahan, amahan ug apuhan nga mga mamumulong. Mga buhing kasinatian pamatood nga Sibagatnon.
Niining ika-upat nga SOAC gipresentar usab sa publiko ang unom ka sertipikadong Organic farms and practices pinaagi sa Participatory Guarantee System nga mekanismo sa nasud.
Dinhi usab sa SOAC, gitaho sa kagamhan lokal kung unsa na ang naabot ug unsa pa ang buot kab-uton. May kahigayunan usab alang sa pagpadayag gikan sa mga mitambong sa ilang mga hunahuna sa angay tagaag duot alang sa paglampos sa programa ngadto sa komunidad.
Nagtanyag usab atol sa SOAC ang municipal, provincial, regional and national offices sa mga programa ug serbisyo nga pwede iaccess sa katawhan.
Ug usab, hawanan sa pagsaway nga may kaubang sugyot sa pagtul-id ug pagpalambo.
3. Ang paLASANG ug ang Flora Tilapia Hatchery
Kawang ang mga hisgot, sugyot, programa ug serbisyo kung dili kini tataw nga Makita diha sa kinabuhi ug paglihok sa katawhan ug mga Komunidad.
Ang Kalambuan nga walay pagtagad sa Kinaiyahan, paghikog kini.
Ang mga serbisyo ug programa sa pag-ugmad sa komunidad nga dili sinati diha sa kinabuhi sa katawhan, istatistika lamang.
Sa karon nga mga panahon, dili lang ang paLASANG ug ang FTH maoy kongkretomg mapakita nga naay kinabuhi diha sa Kinaiyahan, naay Kaugmaon diha sa Malahutayong panglantaw alang sa umaabot nga adlaw-adlaw gipuy-an, gisangyaw ug gisaluhan.
Nga ang Malahutayong Sibagat dili kay puro istorya lang. Tinuod ug nasinati na, masinati pa.
4. Hagit ug Kahigayunan
Anaa ang mga hawanan sa pakiglambigit, anaa ang mga programa ug serbisyo nga gitanyag ug anaa ang mga pag-abag ug pag-abli sa tambayayungay.
Daku nga oportunidad kini. Apan daku nga hagit alang sa mga hugpong nga magtaas ang kakayahang molambogit nga gawasnon. Padayon bang andam usab ang kagamhanang lokal sa pagdawat sa mga pagsaway ug sugyot?
Ang mga kadaugan, dili angay sayangon, mas angay saw-an karon ug sa umaabot.
Apan matood usab nga angayng hinuklugan ang umol-balik o umol-bag-ong Kultura nga may paghatag ug bili sa Kinaiyahan, relasyon sa mga katawhan, relasyon ngadto sa Kabuhatan, Malahutayong Kalambuan, masalmutong katawhan diha sa mga katikaran.
Salamat all sa mga pictures.
Comments
Post a Comment