December 22, 2011
Kami, mga kabatan-onan gikan sa pipila ka lungsod sa mga probinsya sa Agusan del Norte, Agusan del Sur, Surigao del Norte ug Surigao del Sur ug syudad sa Rehiyon sa CARAGA atol niining CARAGA Culture of Peace Youth Camp nga gilunsad sa Alyansa ng Kabataang Mindanao para sa Kapayapaan sa Purok 13, Sibagat, Agusan del Sur, petsa 18-23 sa Disyembre tuig 2011 mopahayag niining among mga gituuhan, sentimento ug panawagan pinaagi niining Sibagat Declaration:
Nga ang Kalinaw, usa ka indibidwal ug kolektibong katungod ug responsibilidad;
Nga ang Kalinaw kinahanglan nga sugdan kini sa matag kaugalingon ug usa ka kondisyon nga nagtunhay ang Kalinaw sa Kinaiyahan, Magbubuhat ug Isig-Ka-Tawo;
Nga ang Kabatan-unan adunay mga kakayahan ug mahinungdanong papel sa pag-umol ug kultura nga dunay pagpakabana sa mga Katilingbanong Hisgutanan ug pag-amuma sa Kinaiyahan;
Nga angayang suportahan sa mga Katigulangan, mga ahensya sa gobyerno, ug sa katilingban ang mga Kabatan-unan nga mamahimong produktibong sector sa Katilingban;
Nga taliwala sa mga kalisdanan ug katilingbanong mga problema, hagit ug hulga angayang maghiusa ang mga kabatan-unan ug mas magpalig-on sa iyang sector nga may pagtagad usab sa uban pang hisgutanang katilingbanon ug ubang sector;
Nga pundamental nga Katungod sa Kabatan-unan ang Edukasyon ug Responsibilidad kini sa kagamhanan ug mga ginikanan nga ihatag;
Nga angay panalipdan, ipalambo ug ipreserba ang Kinaiyahan ug dili kini itugyan ngadto sa monopolyo ug negosyo; ug
Angayan nga makig-hiusa sa uban pang kahugpungan sa mga kabatan-unan, kababayen-an ug uban pa sa Mindanao ug tibuok Kalibutan alang sa hiniusang tumong nga pandayon ang usa ka Katilingbang may Kalinaw, Kalambuan ug tinuod nga Partisipasyon ang Katawhan.
Pamatud-an kini pinaagi sa among hugot nga pagtamod niining maong Deklarasyon ug pagtukod ug mga organisasyon sa kabatan-unan ug pagpalig-on sa mga nagtunhay na.
Mabuhi ang mga Kabatan-unan!
Mabuhi ang Kalinaw!
Mabuhi ang Katawhan!
Filipino Katoliko Youth Fellowship
- Tagbina, Surigao del Sur
- Las Nieves, Agusan del Norte
- Sibagat, Agusan del Sur
- Esperanza, Agusan del Sur
Sangguniang Kabataan of Hawilian, Esperanza, Agusan del Sur
Movement of Young Catalysts for Change
Sibagat Civic Organizations and Fraternities Alliance
Individuals from:
- Bayugan City
- Cabadbaran City
Source: https://www.facebook.com/photo/?fbid=718682280418051&set=a.408211931465089
Comments
Post a Comment