Dili lang kini bahin sa mga nindot nga prinsipyo o teorya nga gisulat sa papel.
Sa tunga-tunga sa nagpadayong krisis sa kalibutan, miabut ta sa punto nga nagkinahanglan na tag aktwal ug buhing kamatuoran sa atong mga alternatiba. Kay kung ang atong mga ideya wala nakapausab sa pundamental nga kahimtang sa katawhan ug sa katilingbang atong gialagaran, basin kinahanglan sa tang mopahulay sa makadiyot, manamin, ug aninawon balik kung tukma pa ba sa reyalidad ang atong ginasangyaw ug ang giya sa atong paglatas niining maong krisis nga atong giatubang.
Mao kini ang mga pamalandong nga nagpabilin sa akong huna-huna gikan sa usa ka batan-ong higalang Nepali nga akong nahimamat sa tulo ka semanang pagtuon—usa ka duot nga pagbayloay bahin sa mga hagit, ugat-hinungdan, ug panaglambigitay sa atong mga alternatibong tubag taliwala sa usa ka dominanteng ekonomiya ug politika nga giharian sa pipila.
Usa siya sa mga aktibong nagbarug alang sa kinaiyahan, tawhanong katungod, ug pagpagahom sa katawhan sa ilamg nasud labi na sa banika. Apan alang kaniya, ang kasaysayan sa ilang nasud human napalagpot ang monarkiya wala hingpit nga nakahatag og kausaban sa kinabuhi sa mas lapad nga populasyon. Kini ang nahimong pabilo sa kasuko sa kabatan-onan nga nidesisyon sa pagpalagpot sa ilang mga lider. Bisan pa sa paningkamot nga ma-estabilisar ang tensyon pinaagi usab ka transisyon, gibasura sa resulta sa piniliay ang mga kanhi nagsangyaw sa alternatibo, ug napahimutang sa pwesto ang usa ka popular nga politiko sa bag-ong henerasyon. Alang sa akong higala, wala usab kini nagatanyag og kasiguruhan; gani sa sugod pa lang, daw gihalad na usab sa altar sa kapitalismo ang ilang nasud.
Dinhi nanukad ang among pagbayloay: nagkinahanglan kita og ikatudlo, ikapakita, ug ikatanyag nga buhing kasinatian. Dili igo ang pagsulti lamang nga atong usabon ang katilingban. Sama halimbawa sa agrikultura, dili igo nga ilirok nga may kaugmaon sa ekolohikal nga panguma—kinahanglang naa tay buhing ebidensya nga ikatudlo. Dili usab kini bahin ra sa simpleng pag-uma, kundi ang pagpaluyo sa mga independenteng hugpong nga nagkahiusa sa tumong, uban ang padayong pagpanawagan sa pag-usab sa mismong gambalay sa ekonomiya ug politika. Pag-umol kini sa usa ka kultura sa katilingban nga may pagpakabana ug dili pasibo—usa ka sistema nga nag-ila nga ang tanan may mahinungdanong ikatampo, ug walay nag-inusarang nagkupot sa tanang sakto nga tubag.
Labaw sa tanan, mahinungdanon nga ang pagpakiglambigit ug pagdasig sa mga ahensya ug lideres sa kagamhanan makahatag og klarong suporta ug polisiya alang sa katawhan.
Kini nga mga panan-awon mao usab ang naghatag og hulagway sa kasinatian sa Manangi EcoFarm (nga kanhi Flora Tilapia Hatchery), sa mga hugpong sama sa Nagkahousang Mag-uumang Organiko kon NAMAO, Kahugpungansa Kababayen-an alamg sa Kalbuan kon KKK, Panaghiusa sa Katawhan alang sa Pagpahiuli sa Lasang kon PALASANG, ug sa daghan pang kanhi na ug mga nagsunod nga namugna nga nagsandurot sa katuyuan sa kinaiyahan, katawhan, kultura, kalambuan (POINTY, BAES, TMPC, KTYO, etc), Ug ang usa pa sa giambitan mao ang naratibo sa pag-transporma sa gambalay pangkalambuan sa lungsod sa Sibagat ngadto sa Organic Agriculture. Nagtunhay kini nga mga kahugpungan tungod kay nagtanyag sila og ideya nga may kongkretong porma—nagtunhay ang mga family farms, ang mga organisasyon nga nagatahi sa agrikultura, kinaiyahan, ug katawhan, ug ang mga aktibong Local Special Bodies sama sa Agriculture and Fisheries Council, ug uban pa. Sila ang naghatag og lig-ong basehanan sa lokal nga kagamhanan sa pagpadayon.
Pinaagi niini, ang mga imprastraktura, programa, serbisyo, ug pundo sa gobyerno nagiyahan dili lang sa abstract nga ideya, kundi sa buhing pagdapat ug praktikal nga padulngan—hangtod na sa pagkutay ug paghatag og solusyon sa merkado pinaagi halimbawa sa Sibagat Organic Farmers Association kon SOFA ug uban pang mga lokal nga kooperatiba ug pamatigayon.
Niining tanan dakong tabang ang mga committed nga farmer-organizers, farmer-policy changemakers, ug pamilyang nagkahiusa sa pag-amuma sa yuta ug kinaiyahan..
Ang panaw sa Flora Tilapia Hatchery padulong sa pagiging Manangi EcoFarm nagpakita nga ang alternatibong dalan posible. Nagdala kini og panginabuhian sa mga silingan ug sa mga mamumuo sa transportasyon, nagpapaspas sa mga imprastraktura ug serbisyo, ug naghatag og buhing pamatuod nga may maayong kaugmaon nga dili kinahanglang gubaon ang kinaiyahan. Sama sa ubang mga dapit sa kabukiran, mosidlak ug mosidlak gyud ang adlaw ibabaw sa mga bungtod—bisan pa man kini tabunan sa baga nga panganod.
Bisan amg BUNAL CHOY, nahimong punto sa bayloay. Samtang maamindot ang teorya o ideya ug buhing alterntiba,.nagkinahanglan ug slogan sa gihapon isip.pagdasig nga makakonektar ang yanong katawhan sa ilang language. Nagkinahanglan kitag mga simbolo ug imahe nga maoy hugupan ug panukaran sa kaikag sa pagpadayon, dili kay imagination lang.
Ang istorya sa kinabuhi luyo sa usa ka batan-ong mamumuo nga mibalik sa bukid aron tikaron ang ilang luna. Sa hilom nag-ugmad ug karon nahimong simbolo sa kadaaig sa daghan pa. Istoeya kini ni Reynan o mas nailang Bunal Choy, kay alang kaniya padayon taliwala sa mga hagit. Kung kapuyon pahulay, ug mokohuag kusog sa pagpadayon.
Human sa tulo ka semana nga pagtuon ug pagbayloay og panlantaw, nipauli na ang atong higalang Nepali. Sa iyang pagbalik, motipon siya sa mga komunidad sa mag-uuma aron mahimong kabahin sa pag-umol og kongkretong tanyag sa pagtubag sa tawag sa panahon. Magtampo.sila subay sa ilamg kakayahan ug makighiusa sa uban pa sa pagkompronta sa krisis sa kinaiyahan nga bunga sa hiwi nga ekonomiya ug politika—mga sistemang gihan-ay aron mag-ihap sa ginansya kaysa sa kaayohan sa katawhan ug kinaiyahan.
Si Prayash ug Reynan, parehong batan-on. Parehong bunguton. Hehe Parehong mag-uuma. Ang ilang kalainan lang seguro kay si Prayash hingistorya ug mapadayagnon, samtang si Reynan sa hilom ug sa buhat magsugilon.
Gamay nga luna ang Manangi EcoFarm , gamay nga lumgsod ang Sibagat ug dili hingpit ang katakos sa mga hugpong, apan kinahanglang magsugod, kimhanglang may ikapakita, kinahanglang may pag-abante,.kinahanglang may kadaugan ug kausaban samtang naglawod ngadto sa hingpit nga dungguanan niining paglawig.
Comments
Post a Comment